Паводле слоў начальніка Генэральнага штаба Узброеных сіл – першага намесьніка міністра абароны Паўла Муравейкі, АДКБ сёньня зьяўляецца, «мабыць, адзінай ваенна-палітычнай структурай, якая абараняе інтарэсы дзяржаў – чальцоў арганізацыі на постсавецкай прасторы», піша Позірк.
«У рамках вучэньняў плянуецца адпрацаваць цэлы комплекс пытаньняў па забесьпячэньні грамадзкай бясьпекі, стварэньні ўмоў для процідзеяньня зьнешняй агрэсіі, барацьбе з незаконнымі ўзброенымі фарміраваньнямі і дывэрсійна-выведвальнымі групамі (ДРГ) праціўніка», – дадаў кіраўнік Генштаба.
Пры гэтым, паводле яго сьцвярджэньня, «плянуецца ўжываць самыя сучасныя прыёмы і спосабы дзеяньняў», якія выкарыстоўваліся ў «апошніх ваенных канфліктах».
Ён пацьвердзіў удзел у вучэньнях «значных кантынгентаў» Расеі, Казахстана, Кіргізстана і Таджыкістана і назваў беларускі кантынгент «самым шматлікім», прадстаўленым «лепшым злучэньнем» – 103-й Віцебскай асобнай гвардзейскай паветрана-дэсантнай брыгадай.
Раней паведамлялася, што вучэньні КСАР АДКБ «Узаемадзеянне-2025», «Пошук-2025» і «Эшалон-2025» пройдуць на палігонах «Ласвіда» і «Лепельскі» (абодва – Віцебская вобласьць) з 31 жніўня па 6 верасьня.
Вучэньні «Узаемадзеяньне-2025», як заяўляецца, «нацэленыя на адпрацоўку пытаньняў падрыхтоўкі і правядзеньня сумеснай апэрацыі па ўдзеле ў вырашэньні крызіснай сытуацыі на тэрыторыі дзяржавы – чальца АДКБ».
12–16 верасьня пройдуць маштабныя беларуска-расійскія вучэньні «Захад-2025«. Паведамлялася, што падчас вучэньняў будуць адпрацаваныя прымяненьне ядзернай зброі і комплексу «Арэшнік«, а таксама супрацьпаветраная абарона, абарончыя баявыя дзеяньні, падтрымка тактычнай авіяцыі і інш.
Форум