13 замежных грамадзян, якія нясуць «пагрозу бясьпецы дзяржавы і грамадзкаму парадку», прымусова высланыя з Польшчы пасьля канцэрту беларускага рэпэра Максіма Каржа ў Варшаве, заявіў 25 жніўня кіраўнік Памежнай аховы Польшчы Робэрт Баган.
Яшчэ 10 іншаземцаў, паводле яго, пакінулі Польшчу добраахвотна.
«30 замежных грамадзян мы ўнесьлі ў сьпіс непажаданых асобаў на тэрыторыі Рэспублікі Польшчы, таксама гэтыя асобы ўнесены ў Шэнгенскую інфармацыйную сыстэму з мэтай адмовы ва ўезьдзе і знаходжаньні ў дзяржавах Шэнгенскай зоны», — цытуе Багана партал wydarzenia.interia.pl.
Чыноўнік паведаміў, што разборы пасьля канцэрту Каржа праводзяцца наконт 63 іншаземцаў. У публікацыі адзначаецца, што 53 чалавекі «ўжо праходзяць папярэднія працэдуры», у дачыненьні да 10 «праводзяцца далейшыя дзеяньні».
Грамадзянства наведнікаў канцэрта, якіх стасуюцца разборы і высылкі, не называюць.
- 21 жніўня паведамлялі, што сямёра грамадзян Беларусі арыштаваныя ў крымінальным парадку пасьля канцэрту Каржа ў Варшаве.
- Усяго затрыманыя 13 беларускіх грамадзян, шэсьць з іх — за дробныя правапарушэньні.
- На канцэрце Каржа на Нацыянальным стадыёне ў польскай сталіцы 9 жніўня затрымалі больш за 100 чалавек — за розныя злачынствы і правапарушэньні падчас канцэрту (захоўваньне наркотыкаў, парушэньне асабістай недатыкальнасьці супрацоўнікаў службы бясьпекі, захоўваньне і пранос піратэхнікі).
- 50 чалавек аштрафавалі, справы аб высылцы з краіны распачалі на 63 парушальнікаў парадку.
- На канцэрце Каржа 9 жніўня ў Варшаве на Нацыянальным стадыёне былі ня менш за 60 тысяч чалавек.
Форум