Такую характарыстыку Пуціну ён даў у інтэрвію тэлеканалу Sat1, які выйшаў у аўторак, 2 верасьня. Яго цытуе Deutsche Welle.
«Мы павінны добра разумець, як абыходзіцца з ваеннымі злачынцамі. Тут паблажлівасьць недарэчная», — сказаў Мэрц. Нямецкае выданьне Der Spiegel адзначае, што раней ён ужо абвінавачваў Расею ў «найцяжэйшых ваенных злачынствах» у сувязі з вайной ва Ўкраіне, але асабіста Пуціна ваенным злачынцам яшчэ не называў.
У дачыненьні да Пуціна Міжнародным крымінальным судом у Гаазе выдадзены ордэр на арышт па абвінавачаньні ў ваенных злачынствах і злачынствах супраць чалавечнасьці; справа зьвязана зь незаконнай дэпартацыяй украінскіх дзяцей. «Ваенным злачынцам» і «забойцам» называў Пуціна былы прэзыдэнт ЗША Джо Байдэн, таксама пра Пуціна выказваўся яшчэ шэраг палітыкаў — аднак далёка не ўсе лідэры краін, якія падтрымліваюць Украіну.
У тым жа інтэрвію Мэрц сказаў, што пакуль Пуцін ня бачыць для сябе прычын імкнуцца да міру з Украінай. На думку канцлера, для гэтага неабходна стварыць «падставы». «У ваенным пляне гэта будзе складана, але ў эканамічным — цалкам магчыма», — падкрэсьліў Мэрц, адзначыўшы, што Расію можна «зьнясіліць» эканамічна, у тым ліку шляхам увядзеньня мытаў супраць яе партнэраў.
Прэс-сакратар расейскага прэзыдэнта Дзьмітрый Пяскоў заявіў, што «Мэрц дапусьціў у апошнія гадзіны вельмі шмат нядобрых заяваў».
Форум