Уначы 28 жніўня Ўкраіну атакавалі каля 600 расейскіх бесьпілётнікаў і 31 ракета. Загінуў 21 чалавек, у тым ліку чацьвёра дзяцей. Яшчэ 52 атрымалі раненьні. У Кіеве ракета трапіла ў пяціпавярховік, разбураныя жылыя дамы, пацярпелі офісы прадстаўніцтваў ЭЗ і Вялікай Брытаніі, а таксама рэдакцыя ўкраінскай службы Радыё Свабода.
Кіт Келаг назваў гэтыя ўдары «абуральнымі нападамі» і падкрэсьліў, што яны ставяць пад пагрозу мірныя ініцыятывы, якія прасоўвае Дональд Трамп.
«Мінулай ноччу Расея ўчыніла другую паводле маштабу паветраную атаку ў гэтай вайне, выкарыстаўшы 600 бесьпілётнікаў і 31 ракету. Цэлі? Не салдаты і зброя, а жылыя раёны ў Кіеве — былі ўзарваныя цывільныя цягнікі, офісы місіяў ЭЗ і Вялікай Брытаніі, а таксама мірныя жыхары.
Гэтыя абуральныя напады пагражаюць міру, якога дамагаецца прэзыдэнт ЗША», — напісаў Кіт Келаг у сетцы Х.
Удары па Кіеве выклікалі абурэньне і ў Эўропе. Старшыня Эўракамісіі Урзуля фон дэр Ляен асудзіла атаку і паабяцала максымальны ціск на Маскву.
Форум