Як паведаміла агенцтва DPA з спасылкай на прадстаўніцу Эўракамісіі, самалёт змог прызямліцца бясьпечна.
Перад гэтым брытанскае выданьне Financial Times апублікавала інфармацыю аб тым, што экіпаж пры пасадцы самалёта скарыстаўся папяровымі мапамі праз адсутнасьць GPS-навігацыі.
«Мы атрымалі інфармацыю ад баўгарскіх уладаў, што яны падазраюць, што гэтае відавочнае ўмяшаньне было зьдзейсьнена Расеяй. [...] Мы добра ведаем, што пагрозы і запалохваньне зьяўляюцца рэгулярным кампанэнтам варожых дзеяньняў Расе», — паведаміла ў камэнтары DPA прадстаўніца камісіі.
Паводле яе, гэты інцыдэнт яшчэ больш умацуе непахісную прыхільнасьць Эўропы нарошчваць свой абаронны патэнцыял і падтрымліваць Украіну.
Ва Ўпраўленьні грамадзянскай авіяцыі Баўгарыі паведамілі, што пры заходзе самалёту на пасадку ў аэрапорце Плоўдзіў зьнік спадарожнікавы сыгнал у навігацыйнай сыстэме. Каб гарантаваць бясьпеку палёту, Упраўленьне неадкладна прапанавала альтэрнатыўны падыход да пасадкі з выкарыстаньнем наземных навігацыйных сродкаў (сыстэма пасадкі па прыборах). Маршрут ня трэба было мяняць.
Агенцтва AP з спасылкай на прэсавую сакратарку Эўракамісіі Арыяну Падэста ўдакладніла, што самалёт бясьпечна прызямліўся, і Урсуля фон дэр Ляен прадоўжыла заплянаваны візыт па краінах Эўрапейскага Зьвязу, якія мяжуюць з Расеяй і Беларусьсю.
«Мы сапраўды можам пацьвердзіць, што было глушэньне GPS, але самалёт бясьпечна прызямліўся ў Баўгарыі», — сказала Арыяна Падэста.
Пасьля Баўгарыі 31 жніўня Урсуля фон дэр Ляен наведала Польшчу, а 1 верасьня знаходзіцца ў Літве.
Форум